قرار هام بخصوص طلبة ساباباشا

هى ديه الاخبار الصح اول خبر حلو اسمعه فى الكلية ديه

شكرا يا جميل فعلا خبر جامد جدااا بس على فكره الفهمته من كلامك ده تحويل من دمنهور لسابا باشا مش من سابا باشا للمجمع يا ريس بس لو الخبر ده اكيد تبقى كله تمام بس مش عارف شكلك فيه و شاكك فيك اصلا و ياريت بقى تحط صوررت و رقم بطقتك عش ان لو طلعت غلط نعرف نجيب بقى هههههههههههههه اوكى
شكرا يا باشا سلام

يا شباب هو يعنى ايه وللراغبين فى التحويل تقديم الورق ده
هل ده معناه ان اللى حيقدم ورقه حيتقنل المجمع ويدرس هناك واللى مش حيكمل ورقه حيفضل فى سابا باشا
ولا ايه اللى فاهم يفهمنى

علي فكره القرار بتاع نقلنا المجمع خلاص اتمضي ونزل في الكليه يعني خلاص هنودع سابا باشا وهنروح مبني كليه العلوم الي في المجمع

شكرا على ردودكم....أنا كنت في الكلية النهارده عايز اقولكم على شوية حقايق :
1.التحويل معناه اننا نتحول اداريا فقط ونبقى تابعين لتجارة انجلش المجمع وليس مكانا.. بمعنى ان المكان زي ما هوا في ساباباشا لكن حنبقى تابعين للمجمع .... م الاخر كده يعني كأن مبانينا هيا مباني المجمع بس بره والأكيد اننا مش حنتنقل ... وكتير من الناس متخوف من حكاية اننا نبقى زي تجارة انجليزي المجمع لان المناهج والدكاترة زي هناك ..يعن ايام الدلع والكام شابتر اللي ندخل بيهم الامتحان خلاص.. وحتبقى المناهج التقيلة زي المجمع.. بس أحلى حاجه ان المكان ثابت وغير كده كلها اشاعات واحنا اكتر شعب يمووووووت في الاشاعات.
2.كلمة على الراغبين بالتحويل طلعت ليها حكمة كبييييييرة جداااااااا كانت غايبة عننا... معناها ان حضرتك لو مش حتحول يبقى حتتنقل اجباري تبع تجارة انجليزي فرع دمنهور وتبقى مع اخواتك اللي اصلا من البحيرة ... وبرده في حالة انك مدفعتش المصاريف او معملتش التحويل حتروح هناك ... وقد أعذر من انذر.
3. طبعا الملحوظة الصغيرة اللي في الاخر والخاصة بدفع مصاريف 2008\2009 كانت برده محل استفسار من كتير من الناس... طلعت معناها ايه ياترى؟ طبعا كلنا متعودين ندفع المصاريف نص السنة ان مكانش اخرها..لكن دلوقتي لازم تدفعها عشان تحول... ورأفة بحال الطلبة وخصوصا ان معظمهم عليهم مصاريف مدفعتش ...حينظر في اية الدفع ويقال ان يبقى نص المصاريف في الاول وحتدفع الباقي في خلال السنة وده مش مؤكد لسه.

بعض الأخبار غير الرسمية (يعني عن طريق الفراشين والأمن وحبايبنا )
1. الكل أكد ان العميد دكتور مندور حيبقى في دمنهور ماسك انجليزي دمنهور .. وأن دكتور كمال الدهراوي حيمسك عميد استشاري لمدة 6 أشهر عشان يظبط الامور( يعني بصفة مؤقتة 6 شهور لانه طلع ع المعاش)
2. حيجيلنا ضيوفنا من قسم في تربية نوعية . ايه هوا الله أعلم؟
3. في واحد قال ان المصاريف حتبقى 4000 بالنسبة للي يحول.. وواحد تاني قال ان المصاريف هيا هيا 3000 ... مين الصح؟ الله أعلم (وممكن تريكا متخصص الصح يقولنا مين الصح ومين اللي مش صح)
4. بالنسبة لنتيجة سنة تانية يقال انها منزلتش عشان الرفع وحتتعلق الخميس او السبت . يارب لما تتعلق تكون حلوة عشان الطلبة متتعلقش على مشانق الاهالي اللي بجد الواحد مش حيزعل الا عشانهم.

وإلى اخبار جديده وياريت تفصلو مابين الاخبار المؤكدة والاخبار غير المؤكدة..وآسف على الأخطاء الإملائة ومستني تعليقاتكم

ماشى يعنى احنا مش هنتقل المجمع و كمان هنردس فى سابا باشا بس هناخد شهاده زى بتوع اسكندريه صح بس ده الانا كنت عايز اعرفه مش اكثر شكرا يا باشا سلام

طب يا شباب انت اتأكدوا من حوار ان شهادتنا حتلقا زى المجمع ولا ايه وفى حاجة تانية هو غاويين يعجزونا ولا ايه انا لسه دافع تاتة الاف مكملتش شهر عايزنا ندفع مصاريف السنة الجاية كمان ايه الرخامة ديه

يعني يا جماعه الطلبه اللي من اسكندريه عليهم يعملوا ايه

احنا هنفضل في سابا باشا طب ايه حكايه التحويل ده

مش التحويل المفروض لطلبه دمنهور اللي عايزين يجوا يكملوا في سابا باشا وبس

احنا في تحويل لينا بخصوص المجمع ولا ايه

انا اعتقد التحويل للى من دمنهور بس عايز يكمل فى اسكندرية

السلام عليكم ورحمة الله وبركاته..
شكرا لردودكم ... بالنسبة للتحويل فالمختصر ان الاخوة اللي شهادة الثانوية العامة بتاعتهم من البحيرة فدول خلاص اتحولو بقرار من الكلية ونزلت كشوفات بأسماءهم واتعلقت في الكلية من زمان.... أما بالنسبة للي شهادتهم من اسكندرية فقدامهم اختيارين ... ياما يدفعو المصاريف ويقدمو الأوراق المطلوبة والدمغة ويكملو في ساباباشا ويكونو تبع اسكندرية ... ياما لو مدفعوش المصاريف او مقدموش الورق المطلوب في القرار براحتهم الكلية حتحولهم لدمنهور وحيسافروا هناك ويبقو اسكندرية فرع دمنهور... يعني كده كده اللي عاوز يكمل في ساباباشا لازم يكون واخد شهادة الثانوية العامة من اسكندرية ويكون دافع المصاريف وكمان يقدم الورق المطلوب... وكمان مينفعش للاخوة اللي اتنقلو دمنهور بقرار من الكلية انهم يحولو اسكندرية ... وعلى فكرة الكلام ده بالنسبة للكلية مؤقت وحتبقى فترته 3 سنوات ... يعني مفيش دفعة اولى عندنا ... والسنة الجاية مش حيبقى في دفعة تانيه وهكذا الى ان تكون الكلية دفعة رابعه بس في اخر سنة وبعد كده كله في دمنهور ... معنى كده ان اللي يقبل كلية تجارة انجليزي فرع دمنهور السنة دي حيروح دمنهور على طول حتى لو كان في اسكندرية لان السنة دي مش حيدخل عندنا دفعة اولى .. يارب اكون قدرت اوصلكم الكلام واي استفسارات انا موجود....


وإلى تريكا أقولك أنا تبع اللي مدفعوش المصاريف ونتيجتي محجوبة وده اليوم الرابع اللي يعدي عليا من غير ما اعرف النتيجة... راضي بقضاء ربنا زي ما يكون ومسيري حجيبها لما افضالها وربنا يستر ... دعوات المنتدى معانا وكل سنة وانتو بخير بمناسبة نصف شعبان والقرب لرمضان... وشكرا على الخلفية الرائعة جميلة بجد بس أنا معترض ومحدش يقول ليه... غيييييييييييييظ

واحشنى موووووووووووووووووووووووووووووووووت يا لفلى كنج
وتغطية اكثر من روعة يا راجل ايه الحلاوة دى
معلومات جديدة بس فيها كتير من عدم مراعاة ظروف الطلبة
ربنا يستر بس فى النتيجة الاول
ربنا يكرم الجميع

ميه ميه يا معلم والله احلى كلام بس انا بالنسبالى سابا باشا احلى وانضف بكتييررررررررررر من المجمع واقرب من بيتر انا عشر دقايق اكون فى البيت وبعدين المجمع لامم بشر وامم ومن كل صنف لون وشكل بقه انت على مزاجك وحاجه قرف ربنا يستر علينا

يا جماعة حد يقولى أيه الأخبار نقل سنة رابعة الى المجمع هو ده فعلا بجد يا ريت الى عارف حاجه صح و متأكد يقوله